Militanti kundër qytetarit

Nga Artan Fuga, botuar në Dita, 29 korrik 2015

Artan-FugaMilitanti si perkufizim eshte dhe duhet te jete nje qytetar aktiv politikisht, me i ndergjegjeshem për rolin e vet në shoqëri, të sakrifikojë për të mirën e përgjithshme, aktivizohet në parti politike dhe mobilizohet për të mbrojtur interesat e qytetarit, që lufton për parime deri në sakrifica.

Kështu thonë librat së paku, kështu mësojnë edhe brezin e ri në shkolla kur i flasin për të kaluarën, por unë duke parë të sotmen nuk i besoj më historisë.

Militanti i sotëm vështirë se ka ideale, ideali i tij shpesh është përfitimi personal.

Kur janë manipuluar zgjdhjet, kush e bën thoni ju? Militanti.

Kur bëhen antimitingje dhe formulohen sharje në media kundër të tjerëve, kush e bën thoni ju? Militanti.

Kur për cdo gjë që thotë shefi, ka bindje të verbër, kush rreshtohet thoni ju? Militanti.

Kush nuk pranon të hajë logjikë, por i thotë të bardhë të zezës, derrit dajë, dhe nëpër tavolina cirret dhe mbron cdo gjë symbyllazi si i verbër, thoni ju? Militanti.

Kush e braktis lidershipin sapo sheh se i rrëshket këmba, thoni ju, Militanti.

Militanti shpesh është armiku i qytetarit, ndërkohë që librat dhe demagogjia e konsideron atë si në shërbim të qytetarit.

Militanti i merr qytetarit vendet e punës në administratë.

Nuk voton qytetari, punë e madhe, voton militanti dhe zgjedhjet janë të rregullta.

Militanti merr tenderat dhe punëson si skllav qytetarin.

Cmimet e para, bursat, projektet i merr militanti për shërbime të cmuara ndaj bosit.

Militanti ka gjithmonë të drejtë edhe në gjyq.

Karrierë bën i riu militant, ai shkon në kamp pushimi, të tjerët i kanë harruar që kanë pas ekzistuar.

Militanti bëhet edhe antar i këshillit bashkiak dhe shpreson në mos ndonjë leje ndërtimi, sëpaku ndonjë licence dyqani a ndonjë shtesë oborri. E braktis qytetarin për kryetarin.

Kur pesë veta janë në një zyrë, shef do të bëhet militanti.

Pse mos t’i duket e bukur jeta militantit?

Për cfarë flitet nëpër tavolina raporton militanti.

Militanti del edhe si analist në media dhe pastaj gufmohet në lagje si intelektual dhe bukurosh.

Bordet e pavarura, të lidhura me zinxhira, formohen me militantë.

Militanti hiqet nga puna kur vjen partia kundërshtare, por gjyqi e paguan pa punuar se i jep të drejtën e kthimit në punë. Fut lekët publike në xhep.

Kur flitet për të drejtat e qytetarit në fakt nënkuptohen të drejtat e militantit.

Takimet me popullin nëpër stola lagjesh, në fushata elektorale në fakt bëhen me militantët.

Militanti është dekor, fshesë me korrent, korrupsionin militantët e bëjnë në administrata.

Militanti militar.
Qytetari qyqar.

Thënie për Shtetin

  • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
    - Georges Pompidou
  • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
    - Otto von Bismarck
  • Politika e vërtetë është si dashuria e vërtetë. Ajo fshihet.
    - Jean Cocteau
  • Një politikan mendon për zgjedhjet e ardhshme, një shtetar mendon për gjeneratën e ardhshme
    - Alcide de Gasperi
  • Europa është një Shtet i përbërë prej shumë provincash
    - Montesquieu
  • Duhet të dëgjojmë shumë dhe të flasim pak për të berë mirë qeverisjen e Shtetit
    - Cardinal de Richelieu
  • Një shtet qeveriset më mirë nga një njëri i shkëlqyer se sa nga një ligj i shkëlqyer.
    - Aristotele
  • Historia e lirisë, është historia e kufijve të pushtetit të Shtetit
    - Woodrow Wilson
  • Shteti. cilido që të jetë, është funksionari i shoqërisë.
    - Charles Maurras
  • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
    - Ruggiero Bonghi