Gjykata shpall antikushtetuese Byronë Kombëtare të Hetimit

Gjykata Kushtetuese, 17 prill 2015

Gjykata Kushtetuese shpalli si të papajtueshëm me ligjin e Policisë së Shtetit ngritjen e strukturës së Byrosë Kombëtare të Hetimit, çka do të thotë se të gjitha përpjekjet për të patur këtë organ hetimor duhet të ndalen.

Njoftimi u dha nga vetë Kushtetuesja në faqen e saj zyrtare, ndërkohë që nuk dihen ende se cilat janë argumentët e kësaj gjykate për konsiderimin si “antikushtetues” të Byrosë Kombëtare të Hetimit.

Në fakt, në muajin tetor ligji u dërgua në Kushtetuese pasi u konsiderua nga deputetët e opozitës se prekte kompetencat e prokurorisë në rast se pranohej ngritja e BKH-së pas ndryshimeve që iu bënë ligjit për Policinë e Shtetit.

Në fillim të muajit prill, në vendin tonë mbërritën për këtë çështje edhe dy ekspertë të FBI-së, të cilët zhvilluan një takim me ministrin e Brendshëm për të dhënë ekspertizën e tyre për ngritjen efikase të strukturës së Byrosë së Hetimit, e deklaruar se do të luftonte korrupsionin dhe krimin e organizuar në vend.

Nga ana tjetër, gjatë muajve të fundit jursitët vendas, por edhe misioni EURALIUS rekomanduan që BKH-ja të ngrihej sipas modelit USKOK të Kroacisë, e cila ka shënuar rezultate në goditjen e korrupsionit, duke arrestuar funksionarë të lartë shtetërorë.

VENDIMI

Gjykata Kushtetuese e Republikës së Shqipërisë, mori në shqyrtim çështjen me palë:

Kërkues: Një e Pesta e Deputetëve të Kuvendit të Shqipërisë (Anëtarë të Grupit Parlamentar të Partisë Demokratike)

Subjekte të Interesuara: Kuvendi i Republikës së Shqipërisë, Këshilli i Ministrave

Objekt: Shpalljen si të papajtueshëm me Kushtetutën të Kreut VI “Byroja Kombëtare e Hetimit” (nenet 27-36) dhe nenit 49 të ligjit nr.108/2014 “Për Policinë e Shtetit”.

Pasi shqyrtoi dhe analizoi pretendimet e ngritura nga kërkuesi, si dhe prapësimet e paraqitura nga subjekti i interesuar, me vendimin e datës 17.04.2015, bazuar në nenet 131 dhe 134 të Kushtetutës së Republikës së Shqipërisë dhe ligjin nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, Gjykata Kushtetuese,

VENDOSI:

– Shpalljen si të papajtueshme me Kushtetutën e Republikës së Shqipërisë të Kreut VI “Byroja Kombëtare e Hetimit (nenet 27-36) të ligjit nr. 108/2014 “Për Policinë e Shtetit”.

– Rrëzimin e kërkesës për shfuqizimin e nenit 49 të këtij ligji.