BERZH: Kredi prej 100 milionë euro për Agjencinë e Sigurimit të Depozitave
Publikuar në Top Channel, 26 shtator 2013
Kredia është në formën e garancisë dhe mund të përdoret nga Agjencia e Depozitave vetëm nëse do të ketë nevojë në rastet e goditjeve të mundshme në sistemin bankar. Në njoftimin për shtyp BERZH thotë se qëllimi i kredisë është të parandalojë dështimin e mundshëm të ndonjë banke dhe izolimin e saj për të mos u shndërruar në rrezik sistemik për gjithë sistemin.
Sipas BERZH kjo kredi përmirëson treguesin e mbulimit të depozitave nga ana e Agjencisë, duke siguruar mbrojtje më të mirë për depozituesit dhe forcuar besimin në sistemin financiar të vendit. Sipas ligjit shqiptar, Agjencia e Sigurimit të Depozitave garanton në masën 100 për qind të gjitha kursimet e individëve në banka që janë deri në 2.5 milionë lekë. Për BERZH funksionimi i mirë i skemave siguruese të depozitave konsiderohet si element kritik për sistemin financiar duke ndihmuar në rritjen e besimit të qytetarëve tek bankat.BERZH thotë se në Shqipëri, kjo është edhe më e rëndësishme, pasi depozitat janë burimi kryesor dhe dominues i fondeve për bankat shqiptare. “Përmes kësaj kredie të akorduar Agjencisë së Sigurimit të Depozitave, BERZH kontribuon edhe më shumë në zhvillimin e tregut financiar në Shqipëri”, thuhet në njoftimin e Bankës.
/ Top Channel