Kuvendi i Shqipërisë çel punimet e Legjislaturës së 8-të

9 shtator 2013, ora 18

Kuvendi çeli sot punimet e Legjislaturës së 8-të në një seancë që në bazë të Rregullores u drejtua nga deputeti më i vjetër në moshë, zoti Namik Dokle.

Pas fjalës përshëndetëse, ku ndër të tjera u uroi punë të mbarë të gjithë deputetëve, veçanërisht të zgjedhurve për herë të parë, zoti Dokle njoftoi ngritjen e Sekretarisë së Përkohshme, e cila përbëhet nga tre deputetët më të rinj të Kuvendit, që sipas listës së Komisionit Qendror të Zgjedhjeve janë zoti Ylli Shehu dhe zonjat Klajda Gjosha e Olta Xhaçka. Kjo sekretari do të funksionojë deri në zgjedhjen e Byrosë Parlamentare.

Në vijim, drejtuesi i seancës lexoi përbërjen e re të Kuvendit sipas qarqeve, bazuar në listën e KQZ-së. Më pas, Kuvendi ngriti edhe Komisionin e Përkohshëm të Verifikimit të Mandateve sipas propozimeve të krerëve të grupeve parlamentare.

Ndërkohë, pas mbledhjes së grupit të PD, Berisha iu drejtua Presidencës  ku dha zyrtarisht dorëheqjen si kryetar qeverie. Ky akt i hap dritën jeshile ardhjes në pushtet të qeverisë ‘Rama’ e zgjedhur me votë nga zgjedhjet e 23 Qershorit.

Berisha i dorëzoi sot rreth orës 13:10 minuta presidentit, dorëheqjen nga posti që mban prej 8 vitesh dhe ky zhvillim ndodh vetëm pak orë para fillimit të seancës së parë të legjislaturës së re. Takimi mes tyre zgjati rreth 20 minuta.

Nga ana e tij, kreu i shtetit ka afat 10 ditor për të dekretuar qeverinë e re “Rama”. Kreu i shtetit, Bujar Nishani, u shpreh para pak ditësh gjatë një emisioni televiziv se “me të ardhur propozimi brenda datës 10 shtator mund të dekretohet kryeministri i ri”.