Draghi: Qeveritë e Eurozonës duhet të vazhdojnë me reformat, sidomos me ato në tregun e punës dhe atë të shërbimeve

11.01.2011

Kreu i Bankës Qendrore Europiane, Mario Draghi u bëri thirrje vendeve të Eurozonës të vazhdojnë në rrugën e tyre të reformave dhe të mos mendojnë se kriza është lënë pas krahëve. 

Megjithatë, në konferencën e parë për mediat për 2013-ën, kreu i BQE-së shtoi se situata është përmirësuar, më e keqja ka kaluar dhe se inflacioni përllogaritet të jetë nën 2 përqind për këtë vit. I vetmi rrezik për rritjen e tij, shtoi Draghi, është cmimi i karburanteve. “Qeveritë e Eurozonës duhet të vazhdojnë me reformat, sidomos me ato në tregun e punës dhe atë të shërbimeve që ekonomia të jetë sa më kompetitive e Prodhimet e Brendshme Bruto të rriten”, tha ai.

Alarmin për papunësinë e ka dhënë e Jean-Claude Juncker, Presidenti i Eurogrupit, i cili thotë se vendet e zonës së monedhës së përbashkët po nënvlerësojnë rrezikun që u kanoset nga ky fenomen. “Jemi duke nënvlerësuar tragjedinë e madhe që quhet papunësi. Kjo po na shtyp”, tha Juncker duke hedhur më pas idenë e miratimit të një page dysheme në të gjithë Eurozonën për të rritur besueshmërinë e institucioneve europiane në sytë e klasës punëtore”, shtoi ai.

Po përkundër Draghi-t, ai mendon se e keqja nuk është hedhur pas krahëve. “Nuk duhet t’u krijojmë përshtypjen njerëzve se e keqja është hedhur pas krahëve sepse kemi ende shumë punë për të bërë, shumë vendime të vështira na presin përpara”, deklaroi kreu i Eurogrupit.

Prodhimi industrial në Europë pësoi një rënie të re, treguan të dhënat zyrtare të Institutit Europian të Statistikave, “Eurostat”. Të dhënat i përkasin nëntorit 2012. Ky ishte muaji i tretë radhazi që prodhimi industrial në vendet anëtare të Bashkimit Europian goditet nga kriza, rënia e kërkesës dhe në shtete të caktuara, edhe nga rrjedhojat e masave të kursimit në buxhetet kombëtare.

Ndonëse vetëm 0,3%, rënia kundërshtoi pritshmëritë e ekspertëve për rikthimin e rritjes në nëntor. Në tërësi, në harkun e 12-muajve, prodhimi industrial ka rënë me 3,7%. Të dhënat e “Eurostat” kanë vetëm një element shpresëdhënës, atë të reduktimit të normës së rënies, shenjë se po afron fundi i një trajktore tepër të vështirë për industrinë europiane.