Organizatat mjedisore dalin kundër Bashkisë: Të ndalohen punimet

Sipas Reporter.al, 10 mars 2016

Protesta-per-parkun1-1

Një grup organizatash mjedisore në Tiranë e cilësuan projektin e bashkisë për Parkun e Madh të Tiranës si jotransparent, kritikuan dhunën ndaj aktivistëve mjedisore dhe kërkuan më shumë bashkëpunim me qytetarët nga ana e Bashkisë Tiranë. Aktivistët refuzojnë “konsultimet” me dyer të mbyllura me Bashkinë.

Një grup prej 11 organizatash mjedisore kundërshtuan sot projektin për kënd lojërash në parkun e madh të Tiranës duke dalë në konkluzionin se projekti është kryer në shkelje të procedurave mjedisore. Organizatat kërkuan pezullimin e projektit dhe dënuan dhunën e ushtruar nga Policia Bashkiake dhe Policia e Shtetit kundër aktivistëve të dielën.

Paralelisht, një seancë konsultimi e thirrur nga bashkia me aktivistët protestues, doli huq. Aktivistët i thanë BIRN se bashkia i pati dërguar një ftesë mbrëmë në darkë për një takim sot dhe kur aktivistët u paraqitën në bashki, punonjësit e bashkisë kërkuan që seanca dëgjimore të bëhej pa praninë e medias.

Aktivistët refuzuan duke argumentuar se dëgjesat publike, për nga lloji, duhet të jenë të hapur për të gjithë, përfshirë median dhe jo bisedime private mes bashkisë dhe tyre. Ata e braktisën takimin pas pak minutash pa i dhënë kohë punonjësve të bashkisë të kryente prezantimin e projektit.

Edhe organizatat mjedisore patën një problem të ngjashëm me bashkinë, e cila, sipas tyre, pati refuzuar të marrë letrën me shkrim të firmosur prej tyre.

“Duke qenë se Bashkia e Tiranës nuk pranoi të protokollonte një letër të ardhur nga organizatat, [me justifikimin] se qytetarja dorëzuese nuk kishte autorizim me shkrim për dërgimin e letrës, po marrim guximin dhe kurajën qytetare që shqetësimet tona t’ia themi kryebashkiakut mediatikisht”, shkruhet në emailin e dërgimit të deklaratës.

Deklarata i bën thirrje bashkisë të pezullojë punimet dhe të ndjekë procedurat ligjore.

“Bëni publik planin zhvillimor për zonën “Parku i Madh i Tiranës”, të cilin Bashkia Tiranë e ka referuar në disa dalje publike duke e cilësuar si projekti për jetësimin e Parkut! Ju informojmë që ky plan është subjekt i nënshtrimit të procedurave të Vlerësimit Strategjik Mjedisor”, thuhet në letër.

“Pezulloni punimet për zbatimin e projektit të këndit të lojërave deri në informimin dhe përfshirjen e duhur të publikut duke ndjekur procedurat ligjore të një shteti demokratik dhe zhvilloni në detaje projektin e këndit të lojërave dhe bëjeni atë publik si një dokument zyrtar”, shtohej më tej.

Në letër theksohej domosdoshmëria e zbatimit të Direktivave të Bashkimit Europian për Legjislacionin Horizontal, i cili specifikisht forcon rolin e publikut në vendimmarrjen mjedisore dhe në zhvillimin e qëndrueshëm; si dhe Konventa e Aarhus ratifikuar nga Shqipëria në vitin 2000.

Organizatat mjedisore joqeveritare argumentuan se Bashkia Tiranë ka shkelur Nenet 23, 48 dhe 56 te Kushtetutës së Republikës së Shqipërisë; Ligjin nr. 10 431, datë 9.6.2011 “Për mbrojtjen e mjedisit”; Ligjin nr. 146/2014 “Për njoftimin dhe konsultimin publik”; Ligjin nr. 119/2014 “Për të drejtën e informimit”; Ligjin nr. 8672, datë 26.10.2000 “Për të drejtën e publikut për të pasur informacion, për të marrë pjesë në vendimmarrje dhe për t’iu drejtuar gjykatës për çështjet e mjedisit” dhe Ligjin nr.10 440, datë 7.7. 2011 “Për vlerësimin e ndikimit në mjedis”.

Ato i bënë thirrje Bashkisë së Tiranës për më shumë transparencë në faqen zyrtare të saj në internet për projektet aktuale dhe ato të ardhshme, si dhe kanale komunikimi më transparente me lajmërime paraprake në një kohë të arsyeshme dhe mjete zyrtare të informimit.

Organizatat mjedisore dënuan gjithashtu etiketimin si “vandalë” të qytetarëve me ndjeshmëri mjedisore në protestat e organizuara nga shoqëria civile dhe kritikuan ashpër dhunën e ushtruar ndaj tyre nga policia bashkiake.

“Bashkia Tiranë ka dështuar të argumentojë publikisht akuzat për vendimmarrjen e saj jo transparente, akuza të cilat tregojnë se vendimmarrja juaj ka cenuar demokracinë dhe shfaqet si një model i dobët qeverisjeje,” shkruanin organizatat mjedisore në letrën publike për kryetarin e bashkisë së Tiranës, Erion Veliaj.

Letra u nënshkrua nga këto organizata: Albanian Ornithologists Association (AOS), Albanian Society for the Protection of Birds and Mammals(ASPBM), Biologist of Albania, EcoAlbania, EcoPartners for Sustainable Development, Iliria,  GO2,  Institute for Environmental Policy (IEP), Milieukontakt Albania,  Environmental Center for Development, Educaton and Netëorking (EDEN), Organic Agriculture Association.

Bashkia e Tiranës befasoi qytetarët në shkurt të këtij viti kur rrethoi me gardh një pjesë të parkut të madh të Tiranës, një nga të paktat hapësira të gjelbra të mbetura në kryeqytet pas 25 vitesh ndërtimesh të pandërprera dhe gërryerjeje të parkut nga të gjitha anët.

Pas protestave të aktivistëve, Bashkia deklaroi se kishte ndër mend të ndërtonte një park lojërash për fëmijë me kosto rreth 600 mijë euro, për të cilin kishte kryer sakaq tenderin. Kur aktivistët kërkuan lejen e ndërtimit, qeveria iu përgjigj duke deklaruar se e ka miratuar lejen e ndërtimit më 16 shkurt, disa javë pas rrethimit të truallit ndërtimor, gjë që bie ndesh me ligjet.

Situata u përshkallëzua të dielën e kaluar, kur aktivistët u përgatitën për një protestë të gjatë “sit-in”. Policia Bashkiake dhe Policia e Shtetit përdori dhunën për të ndaluar protestuesit, duke arrestuar 16 prej tyre.

Kryetari i Bashkisë Erion Veliaj pretendoi ndërkohë se një polic i policisë bashkiake qe goditur me bisht lopate nga një prej aktivistëve, ngjarje që rezultoi e rreme.

    Thënie për Shtetin

    • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
      - Georges Pompidou
    • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
      - Otto von Bismarck
    • Politika e vërtetë është si dashuria e vërtetë. Ajo fshihet.
      - Jean Cocteau
    • Një politikan mendon për zgjedhjet e ardhshme, një shtetar mendon për gjeneratën e ardhshme
      - Alcide de Gasperi
    • Europa është një Shtet i përbërë prej shumë provincash
      - Montesquieu
    • Duhet të dëgjojmë shumë dhe të flasim pak për të berë mirë qeverisjen e Shtetit
      - Cardinal de Richelieu
    • Një shtet qeveriset më mirë nga një njëri i shkëlqyer se sa nga një ligj i shkëlqyer.
      - Aristotele
    • Historia e lirisë, është historia e kufijve të pushtetit të Shtetit
      - Woodrow Wilson
    • Shteti. cilido që të jetë, është funksionari i shoqërisë.
      - Charles Maurras
    • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
      - Ruggiero Bonghi