Asnjë shenjë për marrëveshje me Greqinë

Sipas DW, 16 prill 2015

0,,18315945_303,00

 

Ministri gjerman i Financave Wolfgang Schäuble në Nju Jork u shpreh qartë, se nuk mendon që javët e ardhëshme do të arrihet një marrëveshje me Greqinë lidhur me pagesën e këstit të fundit nga programi i ndihmave. Sipas tij nuk ka asnjë ide, se si mund të zgjidhet grindja për kushtet e reformës të vendosura nga kreditorët. Dhe se tregjeve financiare as që u intereson fakti, nëse Greqia qendron ose jo në Eurozonë – një Grexit (dalje e Greqisë nga Eurozona) eventual tashmë është “llogaritur”. Përveç kësaj Schäuble druan, se Greqia pa kursin e reformave mund të shndërrohet në një “thes të shpuar”. Qeveria e Aleksis Ciprasit e ka shkatërruar brenda tre muajsh rrugën e mirë ekonomike, në të cilën ndodhej vendi vitin e kaluar: “Kjo është një tragjedi”.

Draghi pret nga politika

Likiditeti i Athinës prej muajsh varet nga kreditë e emergjencës që vazhdon të paguajë Banka Qendrore Europiane (BQE). Vetëm kjo bën që bankat greke ende kanë para, me të cilat ato përmes kredive afatshkurtra i kanë krijuar hapësirë qeverisë. Por sa mund të vazhdojë kështu? Shefi i BQE-së, Mario Draghi, si zakonisht topin ia le në dorë Greqisë. “Përgjigja është në dorën e qeverisë greke. Ne i miratojmë kreditë e emergjencës-ELA (Emergency Liquidity Assistance), për aq kohë sa bankat greke kanë likiditet dhe sigurinë përkatëse. Deri tani BQE ka vënë 110 miliardë Euro në dispozicion, që është kuota më e lartë në Eurozonë”, thotë ai. Por Draghi nuk do të përcaktojë një datë fikse për fundin e kësaj frymëmarrjeje artificiale që po i jepet sistemit të bankave greke. Të martën (13.03) Këshilli i BQE dha dritën e gjelbër edhe për 800 milionë Euro të tjera. Por termin “falimentim i shtetit” shefi i BEQ-së as që do ta çojë nëpër mend.

Hamendësime mbi strategjinë në Athinë

Në Bruksel qarkullojnë prej disa javësh deklaratat e nëpuënsve të BE-së, se janë të tërësisht të zhgënjyer me ecurinë e bisedimeve me Athinën dhe se nuk pritet më një fund i mirë. Zëvendëspresidenti i Komisionit të BE-së Valdis Dombrovskis, përgjegjës për këtë, tërhoqi vëmendjen: “Ne presim nga Greqia që të pozicionohet bindshëm për reformat, e në këtë drejtim koha nuk pret.” Jo zyrtarisht gurpi i punës së Eurozonës, që përgatit bisedimet me Athinën, kishte vendosur një afat deri të hënën e ardhëshme. Më së voni deri atëherë Athina duhet ta paraqesë planin e kërkuar të reformave, në rast të kundërt do të jetë shumë vonë për ministriat, që do të konsultohen për këtë në takimin e Rigës.

Gazeta greke “Ekathimerini” informon, se tani për Greqinë koha nuk pret. Ndërkohë që loja e pështjelluar e qeverisë greke vazhdon të ngjallë hamendësime: premtimet që kryeministri Aleksis Cipras u jep kreditorëve ndërkombëtare, hidhen menjëherë poshtë prej anëtarëve të tjerë të qeverisë. Në përfaqësinë e përhershme diplomatike të Greqisë në Bruksel, pra diplomatët, që i mbajnë kontaktet në nivelin e punës, ndërkohë janë të shokuar. Mbizotëron zhgënjimi, e kjo për faktin se nga Athina vijnë vazhdimisht udhëzime kontradiktore. Ndërkohë që kanë ngjallur indinjatë edhe njoftimet nga takimi i javës së shkuar të grupit të punës të Eurozonës: Gazeta “Ffrankfurter Allgemeine Zeitung” shkruante, se përfaqësuesi grek është sjellë atje si një shofer taksie, që insiston që klienti ta paguajë duke përdorur tonin: hej, ku janë paratë? Veç kësaj ai kishte pranuar, që së shpejti vendi i tij nuk do të ketë më likiditet. Ministria e Financave në Athinë pret shfajësimin.

Gjithnjë e më pranë humnerës

Dyshime lidhur me aftësinë e pagesës së vendit ka shprehur ndërkohë edhe shefi i programit të shpëtimit të Euros, Klaus Regling. “Unë shpresoj, që së shpejti do të ketë përparime, sepse fondet e likiditetit në Greqi po zvogëlohen dukshëm”, tha ai në një intervistë për gazetën portugeze “Diario des Noticias”. Nga xhirollogaritë greke po tërhiqen para në masë, sipas përllogaritjeve të fundit janë tërhequr gjithsej 25 miliardë Euro vetëm tre muajt e fundit. Nga ana tjetër përfaqësuesit e kreditorëve, të quajtur dikur trojka, vazhdojnë të jenë të preokupuar me mbledhjen e shifrave të besueshme.

Në fundjavë gazeta finlandeze “Helsingin Sanomat” botoi një shkresë nga Ministria e Jashtme atje, sipas së cilës në mënyrë aktive po përgatitet një Grexit. E nëse pas zgjedhjeve të së dielës (19.04) do të vijnë në qeveri populistët e djathtë “Finlandezët e vërtetë”, ata mund ta mbyllin dritaren për ndihma të mëtejshme për Greqinë: kjo parti parimisht është kundër ndihmave. Ndërkaq britanikja “Financial Times” duke iu referuar burimeve greke, njofton se qeveria e Ciprasit përgatitet vet për Grexit, në rast se javën e ardhëshme nuk do të derdhen më para nga BE-ja. Nëse ndodh kjo atëherë ka ardhur fundi dhe nuk do të mund të shlyhen më pagesat e ardhëshme për FMN në maj dhe në qershor. E përjavshmja gjermane “Die Zeit” mendon, se edhe Ministria e Financave në Berlin punon për një skenar, se si mund të ecet më tej me Greqinë në rast falimentimi. Një zëdhënëse reagoi ndaj kësaj me habi. Ndërsa ministri sllovak i Financave Peter Kazimir shprehet më qartë: “Greqia po e çon veten gjithnjë e më shumë drejt greminës”, dekalroi ai në intervistë për televizionin e SHBA-së, Bloomberg.

    Thënie për Shtetin

    • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
      - Georges Pompidou
    • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
      - Otto von Bismarck
    • Politika e vërtetë është si dashuria e vërtetë. Ajo fshihet.
      - Jean Cocteau
    • Një politikan mendon për zgjedhjet e ardhshme, një shtetar mendon për gjeneratën e ardhshme
      - Alcide de Gasperi
    • Europa është një Shtet i përbërë prej shumë provincash
      - Montesquieu
    • Duhet të dëgjojmë shumë dhe të flasim pak për të berë mirë qeverisjen e Shtetit
      - Cardinal de Richelieu
    • Një shtet qeveriset më mirë nga një njëri i shkëlqyer se sa nga një ligj i shkëlqyer.
      - Aristotele
    • Historia e lirisë, është historia e kufijve të pushtetit të Shtetit
      - Woodrow Wilson
    • Shteti. cilido që të jetë, është funksionari i shoqërisë.
      - Charles Maurras
    • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
      - Ruggiero Bonghi