BB: Shqipëria me rritjen më të lartë ekonomike në rajon
Banka Botërore prezanton raportin për Ballkanin: Shqipëria, performancë pozitive, 20 janar 2015
Banka Botërore prezantoi sot në Tiranë “Raportin e rregullt ekonomik për Evropën Juglindore”.
Përfaqësuesja e Bankës Botërore Linda Shijaku, deklaroi se rritja ekonomike e rajonit gjatë 2014 ka qenë e dobët dhe arrinte nivelin 0.2%. Ndërkohë, Shqipëria vlerësohet të ketë performancën më të mirë në rajon, ndërsa pritet një përmirësim i mëtejshëm i aktivitetit ekonomik shqiptar.
Në raportin për vitin 2014, BB vlerëson si shumë të rëndësishëm punën e qeverisë në disa reforma. Sipas saj “gjatë muajve të fundit të 2014, rritja ekonomike është gjallëruar si rezultat i përmirësimit të kreditimit, pagesës së detyrimeve të prapambetura nga ana e qeverisë, si dhe rritjes së besimit të biznesit”.
“Pavarësisht luhatjeve dhe goditjeve në tremujore të ndryshme, pavarësisht dhe një mjedis i jashtëm jo i sigurt, rritja ka ardhur nga konsumi i brendshëm dhe investimet. Rritja ka ardhur si pasojë e likuiditetit dhe pagesat e prapambetura. Kreditimi është rigjallëruar, megjithëse normat kanë qenë të ulëta. Kjo tendencë për rritjen ekonomike vazhdon të jetë më e fortë. Kjo varet dhe nga sjellë e shumë faktorëve”, thekson raporti i BB.
Banka vlerësoi se gjatë vitit 2014, ekonomia shqiptare ka pasur një performancë të mirë dhe se klima e biznesit është përmirësuar ndjeshëm:
“Është rritur treguesi i besimit. Pritjet janë dhe për një përmirësim të mëtejshëm. Pjesëmarrja e forcës së punës është rritur, punësimi dhe dëshira për punë ka qenë e përhapur. Përmirësim kanë pasur dhe treguesit për papunësinë, konsolidimi fiskal ka vazhduar. Ka pasur një vonesë të investimeve publike, sidomos në 6 mujorin e pare, megjithatë kjo është rregulluar në 6 mujorin e dytë. Klima e biznesit është përmirësuar ndjeshëm. Siguria energjetike, reforma që ka filluar është shumë e rëndësishme ul barrën fiskale që ka pasur ky sektor. Ky sektor ka qenë një nga gjerat që Shqipëria ka çaluar deri tani. Kthimi në stabilitet financiar është shumë i rëndësishëm”
Edhe Banka Evropiane për Rindërtim dhe Zhvillim ka publikuar sot raportin e saj për rritjen ekonomike të vendeve evropiane. 1.5 % është rritja ekonomike sipas BERZH për Shqipërinë në vitin 2014, ndërsa parashikohet se për vitin 2015 rritja ekonomike do të jetë 2.5%.