Vlerësimi i Moody’s: Shqipëria stabël

Vleresimi i riskut, 13 gusht 2014

Agjencia e vlerësimit të riskut të kreditit “Moody’s” e ka vlerësuar edhe një herë si të qëndrueshme ekonominë shqiptare në raportin më të fundit të saj. Agjencia ka konfirmuar “notën” B1 për borxhin e qeverisë. “Konfirmimi i këtij vlerësimi për borxhin e qeverisë reflekton faktorët pozitivë që kanë balancuar dobësitë që në të kundërt do të ushtronin presion për rënie”, thuhet në raportin e Moody’s. Në këta faktorë pozitivë vlerësohet plani i ngushtë i bashkëpunimit me Fondin Monetar Ndërkombëtar dhe statusi kandidat i vendit për në BE, që shërben si një ankorë për reformat institucionale.

Një efekt të rëndësishëm në konfirmimin e ekonomisë si të qëndrueshme duket se luajnë masat fiskale të marra nga qeveria. Agjencia e vlerësimit të riskut “Moodys” e vë theksin pikërisht në këtë pikë. “Ndikimi parësor për konfirmimin si stabël të Shqipërisë është i lidhur me masat konsoliduese fiskale të adoptuara nga administrata e re përmes një programi trevjeçar nën FMN-në. Këto masa mundësojnë një përgjigje fillestare për përkeqësimin e theksuar të pjesës fiskale në vitin 2013, sidomos sa i përket mbledhjes së të ardhurave, pjesë ku Shqipëria ende vazhdon të performojë më poshtë se mesatarja e fqinjëve”, thuhet në raportin e Moody’s.

Agjencia “Moody’s” i rikthehet në raportin e saj edhe pjesës së shlyerjes së borxheve të prapambetura, të përmendur edhe në raportin e majit të këtij viti. Kështu, njohja e borxhit dhe vijimi i pagesave nga ana e qeverisë shihen nga agjencia si një zgjidhje e mirë me impakt pozitiv, pasi u mundëson kompanive që të paguajnë detyrimet që kanë ndaj bankave. Gjithsesi, nga ana saj agjencia e vlerësimit të riskut pret që borxhi publik të arrijë në 74 për qind këtë vit, çka është një shifër në rritje, dhe më pas të fillojë ulja e tij në mënyrë graduale.

    Thënie për Shtetin

    • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
      - Georges Pompidou
    • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
      - Otto von Bismarck
    • Politika e vërtetë është si dashuria e vërtetë. Ajo fshihet.
      - Jean Cocteau
    • Një politikan mendon për zgjedhjet e ardhshme, një shtetar mendon për gjeneratën e ardhshme
      - Alcide de Gasperi
    • Europa është një Shtet i përbërë prej shumë provincash
      - Montesquieu
    • Duhet të dëgjojmë shumë dhe të flasim pak për të berë mirë qeverisjen e Shtetit
      - Cardinal de Richelieu
    • Një shtet qeveriset më mirë nga një njëri i shkëlqyer se sa nga një ligj i shkëlqyer.
      - Aristotele
    • Historia e lirisë, është historia e kufijve të pushtetit të Shtetit
      - Woodrow Wilson
    • Shteti. cilido që të jetë, është funksionari i shoqërisë.
      - Charles Maurras
    • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
      - Ruggiero Bonghi