KLGJ dhe KLP zgjedhin kryetarët

Nga Edmond Hoxhaj, BIRN, 20 dhjetor 2018

Anëtarët e Këshillit të Lartë Gjyqësor u mblodhën të enjten për të zgjedhur kryetarin e institucionit më të ri që do të qeverisë sistemin e drejtësisë në vend. Naureda Llagami, e zgjedhur si përfaqësuese e shoqërisë civile mori 10 vota nga 11 gjithsej për të drejtuar Këshillin.

Të mërkurën, edhe Këshilli i Lartë i Prokurorisë zgjodhi Gent Ibrahimin si kryetar të saj. Ibrahimi, i cili ka qenë njëherazi edhe ekspert për reformën në drejtësi mori 7 vota kundrejt kandidatit tjetër Nurian Seiti.

Nënkryetar i KLGJ-së u zgjodh Maksim Qoku, i cili mori shtatë vota. Ndërsa anëtarët e KLP zgjodhën nënkryetar Alfred Ballën, i zgjedhur si përfaqësues i shoqërisë civile.

Partia Demokratike e kundërshtoi zgjedhjen e Gent Ibrahimit në krye të KLP, duke e cilësuar këtë si kapje politike të organit të ri të qeverisjes së prokurorisë. Duke përmendur lidhjen familjare të Ibrahimit me ish-ministren Kodheli, PD tha se eksperti i qeverisë nuk duhej ta kishte fare vendin në KLP.

Këshilli i Lartë Gjyqësor dhe Këshilli i Lartë i Prokurorisë janë dy institucionet kyç në arkitekturën e re të sistemit të drejtësisë në vend, të cilat do të drejtojnë sistemin gjyqësor dhe atë të prokurorisë. Secili prej Këshillave përbëhet nga 11 anëtarë, 6 prej të cilëve u zgjodhën mes radhëve të gjyqtarëve dhe prokurorëve dhe 5 anëtarët e tjerë për secilin Këshillin u zgjodhën nga avokatia, trupa e pedagogëve dhe shoqëria civile.

KLGJ dhe KLP kanë për detyrë emërimin dhe promovimin e gjyqtarëve dhe prokurorëve në vend. Ato kanë gjithashtu një rol kyç në zgjedhjen e Gjykatës dhe Prokurorisë së Posaçme kundër korrupsionit dhe krimit të organizuar, e njohur si SPAK si dhe shkarkimin e tyre me 2/3 e votave mbi propozimin e Komisionit Disiplinor.

Këshilli i Lartë Gjyqësor pritet ta nisë punën me plotësimin e vakancave në Gjykatën e Lartë. Ndërsa konstituimi i KLP-së i hap gjithashtu rrugën zgjedhjes së Prokurorit të Përgjithshëm me mandat të plotë. Sipas ligjit, Këshilli i Lartë i Prokurorisë i propozon Kuvendit 3 kandidatura për kryeprokuror.

Anëtarët e KLGJ

Naureda Llagami, kryetare

Maksim Qoku, zv.kryetar

Medi Bici, Gjykata e Lartë

Ilir Toska, Gjykata e Apelit Tiranë

Brikena Ukperaj, Gjykata e Apelit Vlorë

Dritan Hallunaj, Gjykata e Krimeve të Rënda

Brunilda Kadi, Gjykata e Tiranës

Marçela Shehu, Gjykata e Rrethit Kurbin

Fatmira Luli, e zgjedhur nga Avokatia

Alban Toro, i zgjedhur nga Avokatia

Erion Muharremaj, i zgjedhur nga pedagogët

 

Anëtarët e KLP

Gent Ibrahimi, kryetar

Alfred Balla, nënkryetar

Kostaq Beluri, Prokuroria e Përgjithshme

Bujar Sheshi, Prokuroria e Apelit Tiranë

Arben Dollapaj, Prokuroria e Apelit Vlorë

Gentian Osmani, Prokuroria e Krimeve të Rënda

Antoneta Sevdari, Prokuroria e Tiranës

Besnik Cani, i zgjedhur si prokuror në Elbasan

Nurihan Seiti, i zgjedhur nga avokatia

Tartar Bazaj, i zgjedhur nga avokatia

Sandër Beci, i zgjedhur nga radha e pedagogëve

    Thënie për Shtetin

    • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
      - Georges Pompidou
    • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
      - Otto von Bismarck
    • Politika e vërtetë është si dashuria e vërtetë. Ajo fshihet.
      - Jean Cocteau
    • Një politikan mendon për zgjedhjet e ardhshme, një shtetar mendon për gjeneratën e ardhshme
      - Alcide de Gasperi
    • Europa është një Shtet i përbërë prej shumë provincash
      - Montesquieu
    • Duhet të dëgjojmë shumë dhe të flasim pak për të berë mirë qeverisjen e Shtetit
      - Cardinal de Richelieu
    • Një shtet qeveriset më mirë nga një njëri i shkëlqyer se sa nga një ligj i shkëlqyer.
      - Aristotele
    • Historia e lirisë, është historia e kufijve të pushtetit të Shtetit
      - Woodrow Wilson
    • Shteti. cilido që të jetë, është funksionari i shoqërisë.
      - Charles Maurras
    • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
      - Ruggiero Bonghi