“Dy libra të një shkence”

Pedagogët e Fakultetit të Drejtësisë, të qytetit të Shkodrës dr. Entela Hoxhaj dhe dr. Florian Bjanku, promovuan sot dy monografitë e tyre në fushën e drejtësisë: “E drejtë kushtetuese e krahasuar” dhe “Çështja e pronave në Shqipëri”.

Këto dy botime, vijnë pas një pune të mirëfilltë kërkimore-shkencore që autorët kanë bërë në fushën e drejtësisë, të lidhura me ndryshimet kushtetuese dhe sfidën me shtetin ligjor dhe të drejtat e njeriut.

Në aktivitetin “Dy libra të një shkence”,organizuar në Universitetin “Luigj Gurakuqi” të Shkodrës, ishin të pranishëm pedagogë dhe studentë të këtij universiteti, drejtues të qeverisjes vendore, institucioneve juridike, si edhe Kryetari i Gjykatës së Lartë, prof. dr. Xhezair Zaganjori.

Monografia “E drejtë kushtetuese e krahasuar” (Rishikimi i kushtetutave në Evropë), e autores Entela Hoxhaj pasqyron teorinë, praktikën dhe jurisprudencën kushtetuese të shteteve të Evropës kontinentale, të lidhura me problematikat e ndryshimeve kushtetuese respektive.

Botimi është një përpjekje serioze për t’u shërbyer studiuesve dhe studentëve të së drejtës kushtetuese të krahasuar.

Ndërkohë që libri i Florian Bjankut , “Çështja e pronave në Shqipëri” (Sfida me shtetin ligjor dhe të drejtat e njeriut), analizon proceset kryesore ligjore, institucionale, politike në Shqipëri dhe vendet e Evropës Qendrore dhe Lindore, ku reforma e tokës ishte pjesë e rëndësishme e reformave të përgjithshme pas rënies së regjimit monist.

Me këtë botim, autori synon të hedhë dritë në tri drejtime; mbrojtja e së drejtës së pronës, shteti ligjor dhe konsolidimi i marrëdhënieve të tregut të tokës, ku evidentohen çështjet që kanë mbetur ende të hapura dhe që duhen zgjidhur, aspektet e mbrojtjes së të drejtave themelore të njeriut, etj.

Ndërsa autori Florian Bjanku, tha se tematika që ai trajton, “Çështja e pronave në Shqipëri¨, ka një ndjeshmëri dhe aktualitet të lartë në publik.

Thënie për Shtetin

  • Një burrë shteti është një politikan që e vë vehten në shërbim të kombit. Një politikan është një burrë shteti që vë kombin e tij në shërbim të tij.
    - Georges Pompidou
  • Në politikë duhet të ndjekësh gjithmonë rrugën e drejtë, sepse je i sigurt që nuk takon kurrë asnjëri
    - Otto von Bismarck
  • Politika e vërtetë është si dashuria e vërtetë. Ajo fshihet.
    - Jean Cocteau
  • Një politikan mendon për zgjedhjet e ardhshme, një shtetar mendon për gjeneratën e ardhshme
    - Alcide de Gasperi
  • Europa është një Shtet i përbërë prej shumë provincash
    - Montesquieu
  • Duhet të dëgjojmë shumë dhe të flasim pak për të berë mirë qeverisjen e Shtetit
    - Cardinal de Richelieu
  • Një shtet qeveriset më mirë nga një njëri i shkëlqyer se sa nga një ligj i shkëlqyer.
    - Aristotele
  • Historia e lirisë, është historia e kufijve të pushtetit të Shtetit
    - Woodrow Wilson
  • Shteti. cilido që të jetë, është funksionari i shoqërisë.
    - Charles Maurras
  • Një burrë shteti i talentuar duhet të ketë dy cilësi të nevojshme: kujdesin dhe pakujdesinë.
    - Ruggiero Bonghi